“Хамгийн чухал нь эрүүл мэнд” зорилтот арга хэмжээний 4-р ээлжийн эмч нар томилолтоос ирлээ

“Хамгийн чухал нь эрүүл мэнд” зорилтот арга хэмжээний 4-р ээлжийн эмч нар томилолтоос ирлээ

Мэдээ, мэдээлэл

April 07, 2025

17366

Хууль зүй дотоод хэргийн сайдын санаачилгаар яамны харьяа агентлаг байгууллагын төрийн цэргийн болон хууль сахиулах байгууллагын алба хаагч, тэдгээрийн ар гэрийнхнийг эрүүл мэндийн үзлэгт хамруулах “Хамгийн чухал нь эрүүл мэнд” зорилтот хөтөлбөрийг эхлүүлсэн.
Энэ хүрээнд Төрийн тусгай албан хаагчдын нэгдсэн эмнэлгийн эмч, сувилагч нараас бүрдсэн баг өнгөрсөн 11 дүгээр сараас эхлэн орон нутагт томилолтоор ажиллаж байна.
3 дугаар сарын 10-ний өдөр замд гарсан 9 хүний бүрэлдэхүүнтэй 4-р ээлжийн баг 26 хоногийн хугацаанд нийт 4500-аад км зам туулж Ховд, Завхан, Говь-Алтай аймаг болон Говь-Алтай аймгийн Алтай сумын 0214-р ангийн бие бүрэлдэхүүн, хилийн заставуудад ажиллаж нийт 1900 орчим алба хаагч, тэдний ар гэрийнхэнд эмнэлгийн тусламж үйлчилгээ үзүүллээ.
4-р ээлжийг Төрийн тусгай алба хаагчдын нэгдсэн эмнэлгийн гэмтлийн их эмч, АУ-ны магистр, клиникийн профессор, тэргүүлэх зэргийн эмч, дэд хурандаа Б.Нарансүх ахалсан бөгөөд эмч сувилагч нарын багийг өнөөдөр Төрийн тусгай албан хаагчдын нэгдсэн эмнэлгийн захирал АУ-ны доктор, дэд профессор, дэд хурандаа Н.Одонгуа хүлээн авч уулзлаа.

Төрийн тусгай албан хаагчдын нэгдсэн эмнэлгийн 8 эмч сувилагч, Шүүх шинжилгээний ерөнхий газрын сэтгэл зүйч зэрэг 9 хүний бүрэлдэхүүнтэй 4-р ээлжийнхэн алба хаагчид болон тэдний ар гэрийнхэнд хэвлийн эхо болон зүрхний бичлэг хийж, ясны сийрэгжилт, биеийн индекс тодорхойлох аппаратаар оношилгоо хийсэн. Мөн ДОХ, тэмбүү, элэгний В, С вирус, цусан дахь глюкозын хэмжээг тодорхойлох лабораторийн түргэвчилсэн тестүүдээр шинжилгээ хийлээ.
Ховд, Завхан, Говь-Алтай аймгууд нь өндөрлөг газар байрладаг учир төрийн цэргийн болон хууль сахиулах алба хаагчдын дунд даралт ихсэх, зүрх судасны өвчлөл өндөр, мөн нойргүйдлийн хэв шинжтэй алба хаагч олон байсныг эмч нар онцоллоо.